هكتب بالعامية : كان فيه واحده ست بحارتنا اسمها ام فرنسا ، دمها خفيف وكنت احتار من لسانها السليط ،واللي فيه كلام و معاني قاموس الحواري بس كان كلامها احيانا تحتار في معانيه ، وكانت مع كل جملة تقول (عجايب يا عيال ) او عجايب يا ولاد الو.... قبيحة الكلمة ولا داعي لذكرها .
وانا احترت في الوضع الراهن لحالنا وسياسات وخطط ......تتحط لتسحلنا احنا العرب الي غير رجعة وللاسف فالقنوات الفضائية واشهرها الجزيرة والعربية ارجعتني لام فرنسا لاقول عجايب يا عيال...
مثلا : الجزيرة تستضيف فيلسوف الهزيمة او النكسة الاستاذ العلامة الكاتب الكبير الصحفي .... محمد حسنين هيكل ابو كل الالقاب الجبارة ليقول :
بصو نكسة 67 كانت ستقع ستقع ولو اي حد مكان عبد الناصر كان هيعمل اللي عملة عبد الناصر.. ومازال ينهق في الجزيرة من سنتين واكتر يوم الخميس والجمعة يعاد ... عجايب يا عيال.
هو الاستاذ الصحفي أل ..... لسه بيضخ سمومة الرقيقة انا علي فكرة احب اسمع له وهو بارع في التنويم المغناطيسي ،تشعر وانته بتسمع له واناقته امامك ورائحة عطره تشمها برده ان الرجل ده عالم ببواطن الامور ومجريات الاحداث ...... وبصراحة محترم ،طب يا عم الفيلسوف ما تكلم في الحاضر كل اسبوع بدل ما تنيمنا اسبوعيا لمدة ثلاث سنوات يحكي ويحكي ويدور ويلف وبصراحة قلب الحقيقة بل والحقائق لدرجة ان تصدق ان عبد الناصر مظلوم في نكسة 67 طب مين يا عم اللي مسئول يقول لك الغرب و المؤامرات ...... ثم لما تيجي اي مناسبة عن الملكية ... في مصر يطعن فيه ..... ويمرمغ فيها التراب ... وعند ذكر اسم السادات تلاقي وشه يصفر ويبدء بالتحور والتلوين وبرده يمرمغ بالسادات الارض ..... الي اخر كلامة في خريف الغضب... ، وعند ذكر الوضع الحالي بالعالم العربي يبدء بالابتسامة العريضه وعجايب يا عيال بقه يتفشخ الي شكل قارب نيلي هلكان .... ويتهيئلك ان الدنيا خربانة واحنا في غرق وو انهيار وو .
عجايب علي رجل وصل الي اكثر من ثمانون عام من العمر ومازال في تخاريف السياسة يبس سمومه ...او مع العسل يدس السموم ما بعدها سموم يا عم اعتزل اللعب بقي زي اللعيبه اللي بيجيلها غضروف بالركبة ... اعتزل اشرف لك .
العربية :
تفتح عليه تلاقي الدنيا بمبي والجو ربيع والدنيا كلها في اعياد ... ما لهاش دعوة دماغ بقي مديرها المحترم يعطيك اخبار لا هي تفيدك ولا هي تفيده بس اهم حاجه بالعربية اخبار البورصة علي طول حمراء حمراء...... والخبر الاهم اخبار الرياضة الواد اللعيب ده جاب جونين والتاني مفيش احرف منه مكسر الشبكة وراس الحكام وهكذا يا.... عجايب ياعيال .
الجزيرة والعربية
زي الاهلي والزمالك بالضاد ( مع احترامنا لهم ) قطبين في اعلام مدسوس الكل يدس السموم في بعضه البعض العربي لاخيه العربي والغربي للعربي واليهود مسيطريين تماما فيهما ، ويتم تقسيم الدول العربية الي اقسام او تقسيم المقسم وتجزءة المجزء بصراحة من ساعة ما انطلقت القنوات السالفة الذكر والعالم العربي في انهيار .... انهيار واخبارهم تسبب ارتفاع في الدم مع سقوط كل الشعر من الانسان الاصلع .... عجايب يا عيال.
مع الاعتذار للشرف....
هناك 3 تعليقات:
وإعلام الست المحروسه نسيتو ليه
استاذنا
مقالة في وقتها وواضح من الاحداث ان الغث اختلط مع الثمين ، والعربية والجزيرة بيرسموا اللي اتخطط لهم بدون او بمعرفة ذلك
تقدر تقول ان الجزيرة والعربية بل والاعلام العربي معظمة مخلب قط للاستعمار الجديد...القديم
الي الاخ ماكس
ارجوا فتح حوار بيننا لكي اوضح لك كلامي لانه يبدو انك لم تستوعبة
المهم نتشرف بكلامك وزيارتك
إرسال تعليق