الموضوع معقد شويه لكنه بسيط
والحكايه من الاول علشان تعيشوا معايا فى المشكله ان انا الاسبوع اللى فات حضرت حفله لتامر حسنى لحد كدة والموضوع عادى تمام حتقولولى تمام ايه اللى مزعلك بس يا بختك يا عم حفله وهيصه والحياه حلوة حقولكم ماشى المشكله بقه حصلت لما رجعت البيت وعملت فنجان قهوة على الريحه وولعت السجاره والمزاج تمام وقولت اشوف الدنيا ماشيه ازاى قعدت قدام الكمبيوتر ودخلت منتدى انا عضو فيه وقولت اعمل موضوع عن واحد اسمه العميد / ابراهيم الرفاعى الراجل ده كان قائد لوحده من القوات الخاصه اسمها المجموعه 39 قتال واستشهد فى حرب اكتوبر المهم بدات فى تجميع الموضوع والصور وخلافه ولقيت نفسى مرة واحدة (صدقونى والله) عاوز اعيط لانى اكتشفت ان الراجل ده اسطورة بمعنى الكلمه فعلا بطل بطل بجد مش اى كلام ولقيت نفسى بقول لنفسى انتى فين يا مصر ؟
انتى فين يا بلدى ؟ انتى فين ؟ ليه انا مش شايفك ليه مبقاش فيكى ابطال زى الراجل دة اللى مات وهوة بيدافع عنك ولو فى لسه ابطال هما فين ؟ ليه مش شايفنهم ؟ ليه هى خلاص البطوله بقت حاجه نادرة ومش موجوده طيب العيب فين العيب فينا ولا فى ظروفنا ولا فى ايه بالظبط مش عارف
المهم خلصت الموضوع وانا بسأل نفسى انتى فين يا مصر ؟ ولقيت نفسى مخنوق ومش قادر افكر وعاوز اتكلم بس اتكلم مع مين ؟ كلمت اخويا قالى بقولك ايه يا عم انتا شكلك دماغك فوتت سيبنى انام كلمت واحد صاحبى قالى بقولك ايه النهارده الخميس تعالى نروح ديسكو وكبر دماغك يا عم قولت اسأل حد تانى غير اخويا او صاحبى حد معرفوش وبسألكم دلوقت هى فين مصر ولحد دلوقت مش عارف مصر فين ممكن حد يقولى مصر راحت فين
وصدقونى والله انا مبدعيش وطنيه ولا انا ثورجى ولا اى حاجه من الحاجات دى انا واحد عادى زيى زى اى حد فيكم واحد فى ليله واحدة شاف اكتر من 300 بنت بتجرى ورا عربيه تامر حسنى الهمر وشاف واحد تانى مات علشان كرامه البلد دى وللاسف منعرفش عنه حاجه ويا ريت تجاوبونى هى مصر موجودة وانا مش شايفها وبكده انا ابقى زى ما قال اخويا دماغى فوتت واكلم صاحبى ونروح الديسكو ولا فعلا مصر مش موجودة عرفتوا ليه انا مخنوق
(منقول من احد المنتديات)
العبد لله( ابن حلال ) :
الشعور ده كان بيجيلى كتير وكنت باسأل اكتر هل ده بسببنا كشباب ام بسبب المسئولين عن الشباب بمعنى او بآخر وللاسف مالقتش حل غير انى افضل اسأل وبس وزعلت اكتر لما بحثت وعرفت عن الشهيد العميد / ابراهيم الرفاعى
العيب مش فى البلد نفسها مصر هيا مصر بس فى اللى فيها في اللى ماسكنها هما اللى وصلونا لكده هما اللى وصلوا إن تامر حسنى يبأى قدوة معروفة ومشهورة إنما الشهيد لازم يفضل فى طيات التاريخ بين الطلال علشان الناس ما تفوؤش للبلاوى اللى بتحصل انا مابحقدش على تامربس .............. يلا ربنا معانا
هناك تعليقان (2):
الزمن في مصر تغير كل شيء تغير ارجع الي حوالي من 15الي20سنه وراء سوف تجد العادات والاخلاقيات قدكانت غير الان في زمننا هذا كانت هناك صله رحم بين الاهل والاقارب اين هي الان ؟؟؟؟؟؟كان هناك حياء في كل التعاملات بين الطلبه في الجامعه وبين الاصدقاء بنين وبنات اين هو الان؟؟؟؟؟؟لايوجد حياء الا من رحم ربي...
بصراحة افضل مفاجاة لي ان رأيت الاسلوب أالراقي والجميل لطرحك المشكلة يا ابن حلال,المشاهد لحال اي وطن تنحدر به الايام الي الهبوط في كل شئ الاقتصاد الاحوال الاجتماعية انهيار طبقات خصوصا الطبقة الوسطي ,انهيار اخلاقي ,,, الخ.
يحدث له وجيعة والم يسمع الحدث ونقيضه في نفس الوقت فيحدث له كما حدث لك تشبع بالموجودالانهياري في كل صوره وانه ليس بالامكان احسن مما كان, لكن انا متفائل انا انظر الي الماء الموجود بالكوب واقصد اذا وجدت كوب به ماء ولكن ليس ممتلئ البعض ينظر الي الجزء الفارغ والاخر ينظر الي ان الكوب غير ممتلئ ,ولكن يجب علينا ان ننظر الي وجود الماء بأي كمية ذلك الامل ,وجود حياة مهما تكن بها من منغصات فمصر المستقبل اراها والله كل يوم بيكم انتم,ارجوك لا تيأس مهما وصلت بك الاحوال والظروفومهما ارتفع قزم الي ركوب همر لا تيأس مصر بخير سوف تري يوما نجلس به سويا نتحدث عن ماضي اليم ونضحك من قلوبنا ونقول ياه كانت ايام غريبه ولكن الان الحياة افضل ...افضل .....,
والي مقال اخر يوضح اكثر الراي ويفنده .
السلام عليكم
إرسال تعليق